Thema:
Job a beh oder abwarte?
Hallo zäme
Ich weiss ned öb ich mit minere Frag da richtig bin, stell sie trotzdem e mal.
I ha 2 Töchtere, die Gross isch 3 1/2J. und gaht jede Mittwuch ganztags id Kita und am Dunnstig no zuesätzlich id Spielgruppe für 3h am Morge. Die Chli isch jetzt ca 4. 5 Mönet alt. I schaffe i de Pfleg und ha uf Endi Muetterschutz kündet ka (27.5.22), will euse Spital leider zuemacht.
Jetzt hett ich en Job in Usicht für 40% Arbetspensum inere Praxis (wett nüme in Spital zrugg, will weg vom Schicht schaffe und Wuchenänddienst). Ha mi gestert döffe go vorstelle. Isch e Gemeinschaftspraxis mit 3 Ärzt, aktuell no 3 MPA's (100%, 40%, 40%), vobi die 2 Niedrigprozentige kündet händ. Leider isch mer die einti Ärztin e chli unsympathisch, chüehl überecho. Ha ghofft, i chönti Stell erscht im September atrete, sie wänd aber scho öpper wo uf de 1.8 afangt. Sprich ich müssti Kitaigwöhnig scho uf de Juli vorzieh, also i ca 2 Wuche. Ich still die Chli no voll, mitem Brei häm ner vor ca 1 Wuche agfange, sie isst no kei ganzi Breimahlziit (ca 50-80g). Abpumpe naja, funktioniert mässig, has scho lang nüme gmacht, müsstis also probiere. Aber i 2 Wuche Schoppe ifüehre (wahrschinlich au mit Aptamil, nur Muettermilch wird schwierig. Und igfroreni Muettermilch find i ziemli gruusig
) und hoffe dass es klappt ? Muettermilchschoppe hät sie au scho gno (mit em Medela Calma Schoppe, aber dass isch scho lang her. Abpumpe bim schaffe find i au ned e so lässig. Ich bin jetzt irgendwie total im Zwiespalt. Einersits wär Stell würkli e gueti Glegeheit (isch grad i minere Stadt, 5min zFuess vo de Kita entfernt, Gmeinschaftspraxis und dadurch flexibli Ferieplanig, Lohn stimmt au etc). Andersits isch mer die einti Ärztin ned sympathisch übere cho und i will au nunig abstille. Irgendwie gahts mer schlichtweg eifach au zschnäll. Sie isch mis letschte Chind und i wett Ziit irgendwie no gnüsse solang sie e so Chli isch. Arbetstäg wäred je en halbe Tag Mäntig und Zieschtig sowie de ganzi Friitig, hett eigentlich lieber 2 ganzi, fixi Täg ka. E so cha mer au nie es verlängerts Wuchenäbd mache . Sie ladet mi jetzt no i für en Schnuppertag (3-4h). Finanziell chöme mer guet über d'Rundi, de Maa macht mer kei Druck. Chönti theoretisch au erscht nächst Jahr e Job sueche wänn die Gross in Chindsi chunnt. Also das wär finanziell würkli keis Problem. De Chopf seit nutz Chance unds Buuchgfühl seit nei, gnüss Mamiziit nochli. Was würdet ihr mache a minere Stell?
Danke fürs zuelose!
Lg
von
heran
am 21.06.2022, 07:04
guets Mörgel
auso wenn du jetz shcon äs komisches Buchgfühl hesch will dyä Ärztin chüel isch und
denn dänk nyt lenger druber nach..
Zyt mit dym Bebe isch so wichtig, das chsch nümm nahcä hole..
Gnyess dyä Zyt no, und gugg nächst Jashr,
wes jetzt so wär dass diä Stell super mega cool wär Ärztin Härlich und nätt wärs angers, aber sooo, nei merci alles göti und los uf dy Buch.. dä will ou no nyt
von
linghoppe.
am 21.06.2022, 07:19
Ja, ufs Buchgfüehl lose isch wichtig! Aber, vielleicht het ja die Ärztin eifach e scheiss Tag gha!! Dahär, i würd die par Stund goh Probeschaffe u denn no mal luege!
Hesch du süsch no irgend es „BetreuuigsNetzwärch“, so quasi, dass du zum i steg ebe s Ching noni muesch id Kita gäh, so die erste zwe drü Mönet, falls de dänksch, dass es mit Schaffe, Ching, Hushalt ebe de glich irgendwie z viel isch! De chönntisch eifach wider künde u de hätsch s Ching wider bi dir….
I ha wider agfange schaffe (ab Novämber) wo Mis zwöite Ching im Sommer i Chindsgi isch cho, u i bi froh gseh, dassi die ersti Zit vom Chindsgi ebe noni ha müesse schaffe!
D Frag isch ja au, wie isches de greglet, wenn mal es Ching chrank isch? Wenn ja bi DIN potentielle neue Job eh grad zwöi kündet hei, isch dört wohl de Personalmangel, u denn chas guet si, dass de ebe glich meh muesch schaffe als abgmacht…. Schwirigi Sach!
von
ZoeSophia
am 21.06.2022, 08:40
Hallihallo,
Auso, wenni öpis i mine bald 35 jährli glehrt ha isches ufe Buuch lose. Und we dä förmlich nei schreit den würdis wahrschinlech la si.
I miechs aber so wie d ZoeSophia schriebt und sicher mal go probe Schaffe. Den hättsch villech chli es bessers Gfühl wies wär dert mit derä beträffende Ärtzin ds schaffe.
Würdi ou mit Kitaiigwöhnig und alles jetzt rächt zackig ga. Das cha i bedi Richtige ga.
I säuber schaffe nach dr Geburt vo mim chline vor 3,5 Jahr no nid und warte gad no bis är im Chindergarte isch und chli isch acho uf nächst Herbst wieder e Stell oder evt nomal e Usbildig.
Gisch bscheid wies witer geit bi Dir?
Alles Guete
Franny
von
FrannyK
am 21.06.2022, 15:46
Hoi zäme
Danke für euchi Antworte. Hät sich grad ziemlich viel gänderet. Ha am Morge früh s'Telefon becho wägem Probeschnuppere. Ha uf mis Buuchgfühl glost ka und gseit dass i Bewerbig zrugg zieh wills mer eifach z' schnäll gaht mit de Kitaigwöhnig.. Sie häts natürlich Schad gfunde.
Churz vor 5i chum i wieder es Telefon über, dasmal Ärztin höchstpersönlich dra. Hät nomal gfrögt wieso i abglehnt han, öbs "nur" a de Kitaigwöhnig liit. Has ihre dänn nomal erchlärt...
Und jetzt chunnts: sie wänd mich unbedingt ha und wäred au bereit, uf mich "zwarte". Sie händ e wiiteri Bewerberin (sind 2 Stelle a 40-60% offe) und hoffed, dass die würd churzfristig uf ca 70% ufstocke bis ich dänn eigentlich bereit wär zum afange schaffe (Kitaigwöhnig isch im Sept, plant, also ab Oktober wär für mich schaffe möglich). Min Maa chönti ab Oktober bis Endi/Mitti Jahr jede Friitig frei neh und uf Kids luege, i würd die Chline also mo und di Morge id Kita bringe. Wär natürlich super wänn das e so klappe würd. Ha jetzt nomal wägeme Probeschnuppere nagfrögt, wär sicher au gschied, dänn cha i mir au nomal es Bild vo de Ärztin mache. Bi gspannt wies usechunnt.... Danke fürs Zuelose
und schöne Abig no 
von
heran
am 21.06.2022, 22:15
ehh wiä schön, denn ganz viel Erfolg das äs de klapt mit em Chinsgi i gwöhnig..
drück dyer Dume das alles klappt
von
linghoppe.
am 22.06.2022, 09:03
gib de Bscheid wiä dy entschiedä hesch
von
linghoppe.
am 25.06.2022, 11:26
S'Vorstelligsgspröch isch au nur 15min gange, da cha de ersti Idruck amigs tüsche... I versuech jetzt mal positiv a die Sach anezgah
.. Und für Kitaigwöhnig bliibt mer jetzt au gnueg Ziit 
