Hoi zäme
Wieder e mal en Biitrag im CH-Forum. I ha churz e Frag bezüglich Hort respektiv würd gern mal euchi Meinige ghöre.
Tochter isch im Summer in Chindsgi cho und gaht jeweils am Mäntig vo 11:50 bis 18Uhr in Hort, am Zieschtig vo 11:50 - 15:30Uhr. I schaffe a dene zwei Täg, am Mäntig bis 17:45Uhr und am Zieschtig bis am 4i. De Maa bringt sie jewils in Chindsgi und holt sie am Abig wieder ab vom Hort (macht Homeoffice, schafft dänn defür au immer länger). Am Zieschtig löm mer sie us Choschtegründ nur bis halbi 4i im Hort, de Maa holt sie ab, sie döff e chli TV luege bis i dihei bin am halbi 5i (sie kriegt züscht sehr wenig TV/Medie, de Zieschtig isch jetzt da halt e Usnahm zur Überbrückig). Mäntig muess sie leider bis am 6i in Hort gah. S'Problem isch dass sie überhaupt ned gern gaht, es isch jedesmal es Drama. Sie isch sehr sensibel und es hät ihre eifach zviel Chind. Sie tuet mir da ehrlich gseit au würkli Leid. Jetzt hät de Vater vonere Chindsgikollegin vorgschlage, dass er evt mäntig -und zieschtignomitag uf kids luege chönti(er würd Tochter au usem Hort neh wills ihre au ned e so gfallt) und ich defür dänn Do und Fr Nomitag. An und für sich kei schlechti Idee, aber mir isch da irgendwie zviel. Die ganz Wuche wär dänn verplant und i ha au no e zweiti 20mönet alti Tochter wo grad viel Ufmerksamkeit brucht. Mi Nomitag hät sie no Karate, also hett ich die ganz Wuche sozäge öppis los bzw wär bsetzt und chönti au nie öppis abmache mit anderne Müettere. Mir isch das irgendwie zviel. I wett ned e so bunde sie. I hä dänn eifach nüt meh vo de ganze Wuche. De Vater macht jetzt irgendwie mega Druck und frögt ständig. Er nimmt jetzt morn Tochter usem Hort und redet no mit de Hortleitig. Min Maa findets au kei schlechti Idee, mir würdet natürlich viel Geld spare. Aber schlussendlich han ich ja dänn Arbet. Aber mir isch es eifach zviel. Was denked ihr? Reagier ich über? Chind sind halt momentan au ziemli astrengend und ich bin erschöpft ehrlich gseit. Grosseltere sind übrigens leider kei Option. Und de Hort müem mer fürs ganze Schueljahr 23/24 zahle luut Vertag. I has mit de Tochter nomal besproche und au ruhig erchlärt wieso sie in Hort muess. Bi dänn gspannt öb sies verstande hät und wies ihre morn dänn gaht im Hort.
Am Mäntig zahle mer übrigens 102Fr und am zieschtig 55fr., also ned grad wenig Gäld.
Was würdet ihr mache i minere Situation?
Danke für euchi Gedanke. Lg 
von heran am 29.10.2023, 13:51
Lieber zspat als gar nöd ;-)
Mittlerwil hät sichs Problem glöst, sie akzeptiert de Hort und s'Drama bliibt us gottseidank 
Mir händ en Wucheplan mit Bildi bastlet und jetzt isch sie au immer "vorbereitet"und weiss, wänn sie in Hort muen. Ich glaube, dass hilft ihre au es Stuck wiit. Vor allem will sie jetzt au gseht, wänn z.B die tolle Sache stattfindet wie z.B.schwümme und Karate.
Bin froh, hät sichs jetzt ipendlet. Wahrschinlich hät sie au eifach meh Ziit brucht zum sich a alles gwöhne, isch halt doch en Unterschied so wie du scho gseit häsch.
Danke für dini Rückmeldig 
Lg