Hallo zäme
Wie mer do oft lest, gönd Chender im Dütsche meischtens scho ab 3 Johr in „Kindergarten“. Anschiinend gratis ond das jede Tag?
Bi üs i de Schwiiz fohd jo der Chendergarte erst ab 4- bzw. 5. Jöhrig ah, denn aber grad als Schuelpflecht.
Mini 3 Jöhrigi gohd nor 1 Vormittag pro Woche id Spellgroppe, well sie en chlini Schwöschter becho het ond ech deshalb no ned wetti go schaffe ond deheim be.
Weles Modäll fendet ehr besser? Bis zom Schuelihtrett deheim bliibe oder scho Fremdbetreuuig ab 3?
LG us Aarau 
von
MarcelineCH
am 16.09.2022, 21:30
Ig dänke, me Cha nid säge welles Modäll besser isch… in DE isches ja „normal“, (u scho zimlich viel Johr lang) dassd Ching scho zimlich früh ine Betreuuigsirichtig chöme, egal ob me se würd bruche (will me muess schaffe oder so) oder nid… bi üs isches ja eher normal, s Ching deheime zloh u sälber oder durch Family z Betreuue z loh…
Daes Kitas u Tagesmüettere git bi üs, isch ja eher „neu“ ….
Es het doch alles siner vor- und Nachteile… wenn muesch (!) goh schaffe, denn bruchsch ja unbedingt e BetreuuigsLösig… chasch deheime blibe, denn ebe nid….
Ig persönlich chas nid nachvollzieh werum me es Ching scho sehr früh ine Betreuuig git, wenns nid tatsächlich nötig isch… das ergit für me kei Sinn… aber bi üs foht z Schuelpflicht ja ebe au scho mit 4/5j a… Auso zimlich viel Früecher (2Johr) wie in DE, da ja dört Dr Kiga kei Pflicht isch, bi üs aber scho…..
Ig ha erst wider agfange schaffe, wo beidi Ching im Chindsgi oder Schuel si gseh… es wär gar nid anders Gange, da e Kita für üs z tüür wär gseh, da dört d Chöste ja Einkommensabhängig isch (Wasi vollkomme legitim finde) und Mini Verwandtschaft alli no voll gschaffet hei…
Ig finde, da gits weder richtig no falsch…. Das isch vo so vielen Faktore abhängig….
von
ZoeSophia
am 17.09.2022, 08:05
Hoi zäme
Ich finde s dütsche Modell, wo ja uf Freiwilligkeit beruet und (fast) nüt choschtet besser. Au super findi d Elternzeit.
I mim Umfeld (Stadt) gönd die meiste Chind scho als Babys id Kita, da mir (Akademikerinne, wo lang studiert und endlich gueti Astellige hend) üsi Jobs ned wend ufgä und i villne Fäll (au bi üs) ned chönd, ohni vom (ned wahnsinnig vill) Ersparte z lebe, obwohl mir ned uf bsonders grossem Fuess läbed (min Maa schafft wie ich TZ und mir hend 2 Kitatäg/Woche)
In D sind aber vili nach de Elterezit us finanzielle Gründ zwunge, beidi Vollzit go schaffe. Das gfindi schlimm. Au chaufchraftbereinigt sind üsi Löhn besser. Dafür bini sehr dankbar! Zwar wäri au gern ned scho nach 5 Mönet wieder TZ igstige, wie das min AG verlangt hed, aber lieber als nach eim Jahr VZ go schaffe isch mir das scho. Aber ja, ich vermisse die Jünger scho sehr bim Schaffe…
LG Elli
von
Ellinor
am 11.10.2022, 20:40
